شرح لعبة سنوكر

السلام عليكم و رحمة الله ..

موضوعنا اليوم يا طويلين الاعمار عن رياضة اعتقد ان اغلبكم يعرفها او على الاقل يسمع بها و لا يدري شلون تنلعب

لعبة السنوكر مشابهة كثيرا للعبة البلياردو من حيث الشكل .. لكن القوانين و الحجم يختلفون تماما ..

طاولة السنوكر




تختلف احجام طاولات السنوكر في العادة .. لكن المقاسات الرسمية في البطولات العالمية و حتى في اندية السنوكر السعودية موحدة و هي بطول 12 قدم و عرض 6 أقدام

الكرات


و تتكون الكور من التالي :

15 كرة حمراء
كرة سوداء
كرة وردية
كرة زرقاء
كرة بنية
كرة خضراء
كرة صفراء
و كرة بيضاء تسمى cue ball و تعرف بالمضراب في مصطلح الكيرم





تكون الكور مصفوفة بهالشكل .. و جمب كل كورة حاطين لك مجموع النقاط اللي تحصل عليها اذا طيحتها ..

يعني تطيح كورة حمراء تحصل على نقطة .. تطيح سوداء تحصل على 7 نقاط و هكذا ..

طريقة اللعب


في البداية لازم اللاعب يطيح كورة حمراء و بعدها أي لون من الألوان الستة .. يعني لو يطيح الحمراء و بعدها السوداء يحصل على 8 نقاط .. نقطة للحمراء و سبع للسوداء ..

ميزة اللعبة انك ما تقدر تطيح كورتين حمرا ورا بعض .. و لا تقدر تطيح لونين ورا بعض .. قانون اللعبة يحتم ان اللاعب يطيح حمراء بعدها أي لون بعدها حمراء و لون .. الخ

هدف اللعبة انك تسجل نقاط اكثر من اللاعب الخصم .. و اكبر عدد من النقاط يقدر يسجله اللاعب هو 147 و هذا ما يصير الا اذا طيح 15 حمراء و 15 سوداء و كل الالوان المتبقية .. و هو أمر صعب جدا و ما قد سواه الا لاعبين قليلين جدا ..

بعد ما تخلص الحمر في الطاولة .. يبدا اللاعب يطيح الالوان بدءا من الاصغر للاكبر .. يعني بداية من الصفراء و انتهاءا بعتاب

طبعا نقطة مهمة في لعبة السنوكر .. اذا اللاعب الخصم ارتكب خطأ يحسب لك نقاط .. يعني اذا مثلا كان دور الحمراء و طق بدالها كورة ملونة بالغلط ينحسب لك 4 نقاط .. و تزيد الى سبع نقاط على حسب قيمة الكورة اللي ضربها و اللي اقصاها السوداء بسبع نقاط .. و اذا طيحت البيضاء ينحسب عليك خطأ بعد

أشهر لاعبي السنوكر




Steve Davis

أحد أشهر لاعبي السنوكر على الاطلاق.. حصل على العديد من الالقاب من أهمها:
6 مرات بطولة العالم
6 مرات بطولة المملكة المتحدة
3 مرات بطولة الأساتذة

امتاز هذا اللاعب باسلوبه التكتيكي و تحكمه في أعصابه بشكل كبير .. و هو من بين القلائل اللي سجلوا العدد الاقصى من النقاط في لعبة السنوكر و هو 147 نقطة ( على فكرة كل اللاعبين اللي راح اذكرهم سجلوا العدد الاقصى)

لكن بصراحة .. اللاعب هذا رغم انه فاز ببطولات كثيرة لكن شخصيا ما يعجبني اسلوب لعبه .. رغم انه يعتبر ثاني افضل لاعب في تاريخ السنوكر بعد الذيب الامعط اللي ابذكره الحين




Steven Hendry

The Living Legend

أسطورة السنوكر .. أفضل من مسك عصا السنوكر .. ستيفن هندري .. قاهر الانجليز خخخخخ ..

اللاعب هذا رغم انه ماهوب لاعبي المفضل .. لكن غصبن عن خشمي اعترف انه افضل لاعب في تاريخ السنوكر .. أصله اسكتلندي .. يعتبر أكثر واحد هبل بالانجليز بعد وليام والاس حق بريف هارت

أصغر لاعب يفوز ببطولة العالم في سن 21 سنة فقط ..

فاز ببطولة العالم سبع مرات .. و ببطولة الاساتذة ست مرات .. و ببطولة المملكة المتحدة خمس مرات

أكثر لاعب فاز بألقاب في التاريخ .. الوحيد اللي قدر يكسر شوكة و هيمنة ستيف ديفز

يلقب بالجبل الجليدي لانه يتحكم في أعصابه بشكل خيالي و في أصعب المواقف اللي تتطلب تركيز عالي جدا و تحكم في الاعصاب تحت الضغط ..

لو اكمل ما قضيت .. لكن نروح للي بعدووو




Jimmy White

من حكة اذنه باين انه زلابة
<-- مطنقر عليه

واحد من افضل لاعبي السنوكر اللي شفتهم .. وصل لنهائي بطولة العالم ست مرات و انرقع فيها كلها هههه

الحق ينقال .. اللاعب هذا يعتبر من اللي اعطوا لعبة السنوكر طابع ابداعي و جمالي .. كان يلعب لمجرد امتاع الجمهور .. تشوف عليه لعبات تفك راسك و تحكمه خطير جدا .. لكن مشكلته انه لعب ضد هندري في اربع نهائيات .. و يعتبر هندري عقدته الوحيدة .. الله يلوم اللي يلومه

رصيده من البطولات قليل مقارنة بمستواه .. لكن مثل ما قلت كان هدفه امتاع الجمهور و الضعيّف كلها على راسه .. وده يفوز ببطولة العالم باللي هي به خخخخ

جيمي وايت كان لاعبي المفضل اول ما عرفت لعبة السنوكر قبل عشر سنوات تقريبا .. لكن بعد ظهور الاخ التالي سحبت على ابو وايت




Ronnie O'Sullivan


اللاعب هذا ساحر .. مولود عشان يلعب سنوكر .. موهبته طبيعية و اسلوبه سلس و ثقته مالها حدود .. بس انه حمااااار

أتذكر ظهوره في منتصف التسعينات .. من بداياته كان يبشر ببروز لاعب غير طبيعي ..

نرجع لحموريته .. الولد مطنش لابعد درجة .. جته فترة أدمن الخمر .. وضعه الاجتماعي رايح فيها .. ابوه و امه في السجن ! شكلها قضية آداب

هو اللاعب الوحيد اللي يلعب بيدينه الثنتين .. يمين يسار ما تعوق معه ابن اللذينا .. و هي ميزة خطيرة خاصة في لعبة مثل السنوكر لانه ما يحتاج يستعمل العصا حقت الخبازين اذا جاء يطق الكورة .. اذا ما طالها باليمين يطولها باليسار

بعد ما فاز ببطولة العالم 2001 اصابه الغرور .. و تكبر على اساتذته .. لدرجة انه صرح قبل مباراته مع ستيفن هندري بليلة و قال: " ابهزم هندري و انهي آماله في البطولة ،، و أرجعه لحياته التعيسة في اسكتلنده" ... و هندري ما رد عليه .. لازم أقول وش صار في المباراة؟ ابو هندري فرك بخشته الأرض و خلاه بيزه ما يسوى بعدها قمط سوليفان و اعتذر لهندري .. الظاهر كان معطيها يوم يصرح تصريحه المخيس !

يمكن اللي ما عنده خلفية عن السنوكر يكون سمع عن روني سوليفان .. لانه قبل أقل من سنة أعلن اسلامه .. و هو على فكرة صديق خاص للزيدي نسيم حميد ..
و من الاشياء اللي تبرهن موهبة سوليفان هو مقدرته على تسجيل العدد الاقصى 147 نقطة و هو عمره 15 سنة بس !

في النهاية أتمنى يكون الموضوع عجبكم.. و على فكرة بطولة العالم قاعدين هاليومين يلعبونها في انجلترا .. و بتخلص بعد اسبوع تقريبا .. و ان شاء الله احط لكم من فاز بالبطولة ..